最近阿史介紹咗唔少同成語有關嘅歷史人物同故事，今次就講下一個歷史人物同關於佢嘅成語故事，就係東漢末嘅孔融。
孔融係東漢末一位魯國名士，相傳係孔子後人，上幾代都為官，自小就有神童之稱。至於後人對呢位仁兄最熟悉，就應該係「孔融讓梨」呢個故事。响《三字經》裡面就有呢幾句關於呢個故事：「…融四歲，能讓梨，弟於長，宜先知 …」故事大概係話佢哋幾兄弟有一次揀梨，佢就揀個細嘅，仲話自己細個揀個細，大嘅留返俾啲哥哥。佢爸爸孔宙聽到佢咁講就非常感動，而呢件事亦傳遍佢家鄉，成為家喻戶曉嘅道德教育故事。不過咁，後世對孔融讓梨呢個故事真實性就有所質疑，因內容不見於正史中。
孔融幼有異才，長大後又成為北海相。但佢响政治上就唔算太大成就，尤其是佢恃才負氣，時常頂撞曹操，好似曹操子丕私納袁熙妻甄氏，佢就寫信俾曹操話「武王伐紂，以妲己賜周公」；曹操出兵打烏桓，孔融又諷刺佢「大將軍遠征，蕭條海外。昔肅慎不貢楛矢，丁零盜蘇武牛羊，可并案也。」曹操使軍謀祭酒路粹誣告孔融，包括「招合徒眾，欲規不軌」、「與孫權使語，謗訕朝廷」、「不遵朝儀，禿巾微行，唐突宮掖」等一堆罪狀，將孔融處死，連孔融全家都被株連。